Il-familji fi kriżi qed jerġgħu jingħaqdu u jiġu rrikonċiljati, bis-saħħa ta’ servizz ta’ terapija tal-familja ffinanzjat mill-Fond Soċjali Ewropew f’Malta.

Is-Servizzi Terapewtiċi Bbażati fid-Dar (HBTS) jiġu offruti lil familji li jesperjenzaw kwistjonijiet relatati mal-vjolenza, il-faqar, l-abbuż, il-mard fiżiku u mentali, kif ukoll sitwazzjonijiet relatati mal-abbuż u n-negliġenza tat-tfal..  

Magħruf bħala “servizz tal-aħħar istanza”, il-mudell ta’ “preservazzjoni tal-familja” huwa l-qofol għas-suċċess tal-proġett. Il-mudell jiffoka fuq l-indirizzar dirett tar-riskji għat-tfal, bil-għan li jgħinhom jibqgħu mal-familji tagħhom minflok ma jitqiegħdu xi mkien ieħor.

Kif jgħid wieħed mill-Koordinaturi tal-HBTS, “Aħna nilħqu dawk meqjusa bħala mhux aċċessibbli u nikkonslaw dawk li ma jistgħux jiġu kkonslati. Aħna l-vuċi ta’ min hu bla leħen u l-ispalla għal min iħossu dgħajjef”.

Il-familji bi ħtiġijiet kumplessi spiss ma jkunux involuti f’appoġġ ibbażat fuq il-kunċett ta’ uffiċċju. Għalhekk, il-membri tat-tim tal-HBTS jaħdmu ma’ familji fid-djar tagħhom, flimkien ma’ servizzi offruti f’għadd ta’ ċentri komunitarji.

Luana Aquilina, il-Maniġer tal-HBTS tgħid: L-ilħna tal-“klijenti” tagħna jitqiegħdu fuq quddiem nett tal-ħidma tagħna. Il-ħiliet, l-għarfien u l-istamina tal-membri tat-tim tagħna huma strumentali biex jagħtu s-setgħa lill-klijenti.”

Dan l-approċċ iffukat fuq il-persuna mhux biss iżid il-probabbiltà li l-familji vulnerabbli jinvolvu ruħhom mas-servizz, iżda jiżgura wkoll li l-interventi offruti mit-tim tal-HBTS jipprovdu għall-ħtiġijiet uniċi ta’ kull familja. Skont ir-rekwiżiti tagħhom, il-familji jista’ jkollhom bżonn appoġġ intensiv minn sa erba’ professjonisti għal ftit sigħat fil-ġimgħa.

Huwa ċar li l-approċċ qed jaħdem. Mit-tnedija tas-servizzi terapewtiċi bbażati fid-dar, in-numru ta’ Ordnijiet għall-Ħarsien maħruġa f’Malta naqas – u aktar familji qed jibqgħu flimkien.

Il-klijenti kienu entużjasti dwar il-fokus tal-proġett li jippermetti biddla, “Issa naf ħafna affarijiet li qabel ma kontx naf dwar it-trobbija. Dan biddel il-fehma tiegħi, il-perspettiva tiegħi – kollox... Jien grat ħafna għas-servizz komunitarju, il-ħaddiema tal-każ tiegħi – li kollha kemm huma għamlu dan possibbli. Biddilni mmens. Għamilli ħajti importanti għalija u għal uliedi.”